Sinurat ni Rolando Jose Felipe Mallari, MD

Ti Municipal Cultural Heritage and the Arts Council (MCHAC) ti Aringay nga idadauluan ni Apo Mayor Eric O. Sibuma ket napasabatan da iti dakkel a carit no kasatno a rambakan dagiti aramid iti kultura. Napagnunumuanan iti MCHAC nga apantay rambakan iti natawtawid tayo a sursuro kadagiti bannuartayo iti napalabas babaen iti maysa a programa para kadagiti agad-adal nga ub-ubing.

Ti panangrambak iti kultura ken tradisyon ket maysa a napateg a paset tapno masucog iti pannakatao iti maysa nga ubing. No mabigbig iti pateg na iti kultura Ilocano, ngumato iti pattapatta ken panagraem iti ubing iti pannakatao na. Isu nga iti MCHAC ket tumultulong nga patibkeren na iti adigi iti panunot ken ricna dagiti ubbing maipanggep iti kultura.

Maysa nga panangisuro kadagit ubbing ket marugian iti pagsasao wenno panagsarsarita. Iti panagadal iti pagsasao ket maysa nga napigsa a ramet tapno maamiris dagiti ub-ubing iti tawidda nga kultura – istorya ti pamilya, istorya iti naggapuan da ken istorya iti tradisyon. Maisao da ken maidanon da kadagiti sangaili nga adda talec na.

Gapu ngarud dagitoy a rason, nagbuwangay iti MCHAC iti salip iti dandaniw, panagbitla, samiweng, sirib ken saririt nga inusar dagitoy ubbing iti pagsasao tayo nga Ilocano idi Julio 30, 2021 idyay Dap-ayan Hall dyay Paradiso Beach Resort. Addu iti timmabuno nga ub-ubing ket isuda dagitoy sumaganad iti nangabak:

SALISAL TI PANAGBALIKAS (PANAGBITLA)

Pagadalan a Nababa

• Umuna a Puesto : Ashee Crizel Jacaban, Sto. Rosario East Elementary School
• Maikadua a Puesto : Zyrine Kim Delos Santos, Sta. Rita East Elementary School
• Maikatlo a Puesto : Ulysses Dulay, Sta. Rita East Elementary School

Pagadalan a Nangato

• Umuna a Puesto : Angela Hitalia, Aringay National High School
• Maikadua a Puesto : Kyla Mae Bernal, Aringay National High School
• Maikatlo a Puesto : Jolina Aquino, Aringay National High School

Salisal ti Samiweng

• Umuna a Puesto. : Girlie Sanchez – Aringay National High School
• Maikadua a Puesto: Ermadelyn Abellera -Aringay National High School

Agputar ti Tocar

• Mark Greg Nisperos – “Silalagiptayo Koma”

SALISAL TI SIRIB KEN SARIRIT

Pagadalan a Nababa

• Umuna a Puesto : Mia Cassandra Marzan, San Benito Elementary School
• Maikadua a Puesto : Kaye Nicole Pumares, Sta. Rita East Elementary School
• Maikatlo a Puesto : March Myka Dilinila, Sta. Rita East Elementary School

Pagadalan a Nangato

• Umuna a Puesto : Janna Mae Carreon, Aringay National High School
• Maikadua a Puesto : Lad Mapanao, San Simon Integrated School
• Maikatlo a Puesto : Sherry Mae Gatchallan, Aringay National High School

Dagiti dadduma ng timmabuno iti pasalip ket ni Xander Jin Gonzales, Sto. Rosario Elementary School; Johanna Shermaine Isibido, Aringay Central Elementary School; Kristine Cassy Rilloma, San Simon Integrated School; Michael John Gamban, Samara Elementary School; Gerylyn Gabriel, Samara Elementary School; Adrian Chester Baltazar, Sta. Rita East Elementary School. Uray saan da napagasatan dagitoy nga ub-ubbing nga makaala iti medalya ket naikkan da met iti premio nga pangragragsac.

Agyaman la unay iti LGU-Aringay iti impakita nga panagtitinnulong dagiti iskuelaan ken mamaestra tapno maiduron ken malpas daytoy nga proyekto. Dagitoy ubbing nga nangabak ket isu danto iti mangitakder iti ili tayo iti pasalip iti probinsya. Sapay koma inton sumaruno man nga tawenen mas naparagsit ken mas ad-adu iti lumaoc. Sapay koma taribayenna tayni Apo Dios nga malpas met iti pandemyan.